Икарди агентлари «Галатасарай» билан келажагини муҳокама қилади

«Галатасарай»нинг аргентиналик ҳужумчиси Мауро Икардининг агентлари футболчининг клубдаги истиқболи юзасидан раҳбарият билан мулоқот бошлашни режалаштирмоқда. Бу ҳақда euro-football.ru хабар беради.

Инсайдер Николо Скира хабарига кўра, футболчи вакиллари билан Истанбул клуби раҳбарияти ўртасидаги учрашув апрел ойида бўлиб ўтади.

Шу билан бирга, Икардига қизиқаётган жамоалар ҳам бор — улар 33 ёшли форвардни эркин агент сифатида шартнома асосида қўлга киритишга тайёр.

Икардининг «Галатасарай» билан амалдаги битими 2026 йил 30 июнгача мўлжалланган. Унинг бозор қиймати 6 миллион еврога баҳоланмоқда.

2025/2026 йилги мавсумда аргентиналик ҳужумчи 36 учрашувда майдонга тушиб, 15 гол урди ва 2 ассист қайд этди.