Наполи сўнгги дақиқаларда Верона устидан ғалабани илиб кетди
Италия А Сериясининг 27-турида "Наполи" сафarda турнир жадвалининг қуйи қисмида бораётган "Верона" билан тўқнаш келди. Бу ҳақда euro-football.ru хабар беради.
Учрашув жуда эрта гол билан бошланди: 2-дақиқада Маттео Политано жарима майдони олдига узатма берди, тўпни ҳимоячи қайтарганидан кейин Расмус Хойлунн вазиятдан унумли фойдаланиб, бош билан чап бурчакка йўллади — 0:1. Кейинроқ Элиф Элмас жарима майдони ташқарисидан кучли зарба берди, бироқ дарвозабон сейв билан жамоасини қутқарди. Яна бир эпизодда Хойлунн дарвозабонга яккама-якка чиқиб кетай деди, аммо Андриас Эдмундссон вақтида қайтиб, зарбани блоклади.
64-дақиқада "Верона" бурчак зарбасидан кейин ҳисобни тенглаштирди: Расмус Хойлунн тўпни бош билан узоқлаштиргач, Ян-Даниэл Акпа-Акпро иккинчи тўпга зарба берди ва рикошетдан кейин тўп дарвозага жой олди — 1:1. "Наполи" тезкор ҳужумларда жавоб қайтаришга уриниб кўрди: Ромелу Лукаку жарима майдони марказига пас ташлади, Элмас бир тегинишда зарба берди, аммо тўп дарвозабон қўлига аниқ борди.
Баҳснинг сўнгги ҳужумида амалдаги чемпионлар барибир ўз сўзини ўтказди: чап қанотдан Жиоване узатган паст пасни Ромелу Лукаку якунлаб, "Наполи"га ғалабани тақдим этди — 1:2.
Ушбу натижадан сўнг "Наполи" иккинчи ўриндаги "Милан"дан атиги бир очко ортда бормоқда. "Верона" эса жадвалнинг энг паст поғонасидаги жамоалар билан бирга қолмоқда.
