Арне Слот: "Клуб, мухлислар ва раҳбарият қўллаб-қувватлаши кучли"
\"Ливерпул\" бош мураббийи Арне Слот АПЛ доирасидаги \"Фулҳэм\"га қарши ўйин олдидан ўтказилган матбуот анжуманида жамоа атрофидаги қўллаб-қувватлаш ҳақида фикр билдирди.
Унинг таъкидлашича, клуб ичидаги ишонч ва бирдамлик юқори даражада сақланиб турибди. Айниқса, Чемпионлар Лигасидаги оғир мағлубиятдан кейин ҳам қўллаб-қувватлаш сусаймаган. 8 апрель куни мерсисайдликлар УЕФА Чемпионлар лигаси чоракфиналининг илк учрашувида ПСЖга 0:2 ҳисобида енгилган эди.
Слот бу ҳолатда энг муҳими — клуб томонидан берилаётган ишонч эканини алоҳида қайд этди. Унинг сўзларига кўра, фақат раҳбарият эмас, балки спорт директорлари Ричард Ҳьюз ва Майкл Эдвардс ҳам жамоани тўлиқ қўллаб-қувватлаб келмоқда.
Шу билан бирга, мураббий мухлисларни ҳам алоҳида тилга олди. У ҳатто оғир мағлубиятлардан кейин ҳам трибуналарда қўшиқлар тўхтамаганини, ишқибозлар жамоага руҳий куч бериб келаётганини айтди. Манчестер Ситига қарши 0:4 ҳисобидаги мағлубиятдан кейин ҳам мухлислар “Ливерпулни яхши кўрамиз” деб қўшиқ айтганини эслади.
“Вазиятни тўлиқ тушунамиз, лекин мен ҳар томонлама кучли қўллаб-қувватлашни ҳис қиляпман,” — деди Слот, деб хабар қилади BBC.
Ҳозирги пайтда жамоа учун энг асосий вазифа — психологик барқарорликни сақлаш ва кейинги ўйинларга максимал тайёргарлик кўриш. Слотнинг баёноти эса “Ливерпул” атрофида ҳали ҳам ишонч ва бирдамлик юқори эканини кўрсатмоқда.
