Рафинья Барселона учун Лондоннинг икки клуби таклифини рад этганини айтди
Барселона вингери Рафинья 2022-йилда Лидс Юнайтеддан кетиши тафсилотлари билан ўртоқлашди. Бразилиялик футболчи Камп Ноуга кўчиб ўтиш учун Лондоннинг икки йирик клуби — Челси ва Арсенал таклифларини рад этганини маълум қилди. Футболчи ушбу танловини ўз профессионал фаолиятидаги энг тўғри қарор деб атади. Бу ҳақда Goal.com хабар беради.
ТНТ Sportс Брасил нашрига берган интервюсида 27 ёшли ҳужумчи ўша пайтдаги трансфер машмашалари ҳақида гапирди. "Менда Лондондан 'кўк' ва 'қизил' жамоалардан таклифлар бор эди, аммо фаолиятимдаги энг яхши қарор Барселона билан шартнома имзолаш бўлган", — дея таъкидлади Рафинья. Маълумки, ўша пайтда Англия Премер-лигаси гигантлари уни ўз сафига қўшиб олиш учун жиддий кураш олиб боришган эди.
Рафинья молиявий жиҳатдан жозибадор бўлган Англия клубларидан кўра, Роналдиньо ва Неймар каби афсонавий ватандошлари изидан боришни афзал кўрди. Каталония клубига ўтганидан бери у жамоанинг асосий фигураларидан бирига айланди ва ички чемпионатдаги муваффақиятларга ўз ҳиссасини қўшиб келмоқда. Турли трансфер миш-мишларига қарамай, вингер клубга содиқлигини намойиш этмоқда.
Суҳбат давомида Рафинья замонавий футболда ким билан бир жамоада ўйнашни исташи ҳақидаги саволга ҳам жавоб берди. У Бавария ҳужумчиси Гарри Кейн номини тилга олди. "У майдонни кўриш қобилиятига эга, ажойиб гол уради. Мен уни буюк футболчилар қаторига қўяман. У деярли даҳо даражасида", — деди бразилиялик юлдуз.
Ҳозирда Барселона таркибни кучайтириш устида ишламоқда. Sport директори Деко шартномаси якунланаётган Роберт Левандовски ўрнига муносиб номзод топиш қийинлигини айтса-да, клуб қисқа рўйхатидан Челси ҳужумчиси Жоãо Педро ва Атлетико Мадрид вакили Хулиан Альварес ўрин олгани айтилмоқда.
