Метанда юрадиган нархи 1000 евродан бошланадиган илк мотоцикл тақдим этилди

Ҳиндистоннинг Bajaj компанияси метанда ҳаракатланадиган Bajaj Freedom 125 мотоциклини серияли ишлаб чиқаришни бошлади.

Мотоциклнинг базавий версияси олд ғилдираги барабанли тормоз билан жиҳозланган. Топ версия бўлса, дискли тормозга эга. Двигател сиғими 125 куб.смга тенг бўлиб, 9,5 от кучини беради. Двигател 5 поғонали механик узатмалар қутиси билан ҳамкорликда ишлайди.

Мотоцикл иккита бакка эга. Биринчиси одатий бензин баки, у 2 литр ҳажмга эга. Иккинчси 12,5 литрли газбаллон бўлиб, у ўриндиқ остига жойлаштирилган. Бир марта тўла бензин ва газбаллон билан 330 км масофа босиб ўтиш мумкин (бензинда 130 км, газда бўлса 200 км).

Мотоцикл соатига максимал 90 км тезликда ҳаракатланиши мумкин.

Bajaj Freedom 125 нинг базавий версияси учун 1000 евро, топ комплектацияси учун 1200 евро нарх белгиланган.