Zalujniy ilk bor matbuot anjumanida qatnashdi. U safarbarlik va urush haqida nimalar dedi?

«Agar odamlar har olti oyda rotatsiya qilishni taklif etishsa, ular qo‘shinlarning jangovar kuchini kamida ikki barobar oshirish lozimligini tushunishlari kerak», – deya qayd etgan u.

Shu bilan birga, Zalujniy aynan Ukraina qurolli kuchlari muddatli harbiy xizmatdan voz kechishni taklif etgani va bunga tayyorligini tan olgan.

Yangi qonun loyihasiga ko‘ra, muddatli harbiy xizmatni 18 dan 25 yoshgacha bo‘lgan yigitlar bir necha oy ichida o‘tashi kerak bo‘lgan boshlang‘ich harbiy tayyorgarlik bilan almashtirish kerak.

«Yozda ham biz muddatli chaqiruv bo‘yicha chaqirilganlardan voz kechishga tayyor emasdik, ammo noyabr oyi oxirlarida buni biz o‘zimiz taklif etdik. Bugungi kun holatida bizga ular kerak emas», – deya tushuntiradi u.

Demobilizatsiya haqida

Bosh qo‘mondon anchadan buyon frontda jang qilayotgan harbiylarni demobilizatsiya qilish masalasiga alohida to‘xtalgan.

Uning so‘zlariga ko‘ra, Bosh shtab va mudofaa vazirligi harbiy holat davrida uzluksiz 36 oydan ortiq vaqt davomida xizmat qilganlarni demobilizatsiya qilishga ruxsat berishga rozi, ammo faqat frontda vaziyat keskin bo‘lmagan holatda, yo‘qsa shunday savol tug‘iladi: Ukraina qurolli kuchlari saflarini tark etuvchi tajribali odamlar o‘rnini kim egallaydi.

«Men jangchilarimiz frontda o‘ta og‘ir sharoitlarda ekanini juda yaxshi tushunaman, – degan Zalujniy. – Umid qilamanki, 36 oydan keyin biz vazifani uddalaymiz va bu odamlarni almashtiramiz».

Frontdagi vaziyat haqida

Urush istiqbollari haqida Valeriy Zalujniy mujmal gapirgan.

«Ishontirib aytishim mumkinki, keyingi yil 2023 yildan farq qiladi, biz buning uchun barchasini qilyapmiz», – degan u va harbiy rahbariyat vazifalarni belgilab bergani va ularning yechimlari ustida ishlayotganini qo‘shimcha qilgan.

Alohida yo‘nalishlar, jumladan Rossiya qo‘shini yozda egallab olgan Baxmut uchun kechayotgan shiddatli janglar, shuningdek, egallanish xavfi ostida turgan Avdiyivka va Maryinka uchun janglar yuzasidan izoh berarkan, Zalujniy barchasini harbiy maqsadga muvofiqlikka qarab belgilash lozimligini ta’kidlagan.

«Bunga qattiq yopishib olish va qaysidir aholi yashash manzili yo‘qotilishidan fojia yasash kerak emas. Harbiy harakatlar o‘z qonunlariga bo‘ysunadi, bu komandirlar, siyosatchilar yoki jurnalistlarga yoqish-yoqmasligidan qat’i nazar», – deya qayd etgan u.

Zalujniy Ukraina qurolli kuchlari har qarich yerni himoya qilishi, ammo odamlarni saqlab qolish zarurati yuzaga kelganda, «shunday qaror qabul qilinishi va odamlar hayoti saqlab qolinishi»ni aytgan.

«Mening asosiy xatom – biz yetkazgan bunday ulkan yo‘qotishlar har kimni to‘xtatadi, deb hisoblaganimdir. Ammo Rossiyani bu to‘xtata olmadi», – degan u.

Bosh qo‘mondonning so‘zlariga ko‘ra, Rossiya qo‘shini behisob snaryadlaridan foydalangan holda shaharlarni vayron qilmoqda va 2-3 oy ichida istalgan shaharni Baxmutga aylantirishi mumkin, ayni vaqtda esa bu Avdiyivka va Maryinka bilan bo‘lmoqda.

Rossiya hukumati Maryinka egallangani to‘g‘risida e’lon qilgan, ammo Zalujniy bunga qo‘shilmadi va ukrain qo‘shini hamon shaharning shimoliy qismini ushlab turganini ta’kidladi.

«Lekin bu aholi yashash manzili endi mavjud emasligini aytishim mumkin», – degan u jiddiy vayrongarchilikni nazarda tutgan holda.