Tovarlar va xizmatlar narxi bir oyda qanchaga oshgani aytildi

Statistika agentligi ma'lumotlariga koʻra, 2025 yilning yanvar oyida iste'mol sektoridagi tovarlar va xizmatlar narxlari oʻrtacha 0,7 % ga qimmatlashgan.

Iste'mol sektoridagi narxlarning yillik (2024 yil yanvar oyiga nisbatan) oʻsish darajasi 9,9 % ni tashkil etgan.

2025 yilning yanvar oyida istemol narxlari indeksi tarkibida oziq-ovqat mahsulotlari narxlari oʻrtacha 0,8 % ga, nooziq-ovqat tovarlari 0,3 % ga va aholiga pullik xizmatlar koʻrsatish narxlari oʻrtacha 1,1 % ga oshgani kuzatilgan.

Mazkur hisob-kitoblarni amalga oshirish uchun 10 mingdan ortiq savdo nuqtalari va xizmat koʻrsatish ob'ektlarida 120 mingdan ziyod narxlar qayd etilgan.

420 turdagi oziq-ovqat va nooziq-ovqat mahsulotlari va 90 turdagi xizmatlar narxlari kuzatildi.