Elektromobil haydovchilar uch xil bo‘ladi

Chalmers texnologiya universiteti (Shvetsiya) va Delaver universiteti (AQSH) tadqiqotchilari elektromobil egalarining odatlarini o‘rganib chiqib, ularni uch toifaga ajratishdi.

Tadqiqotdan chiqarilgan eng asosiy xulosa shuki, akkumulatori katta va qimmatbaho elektromobil sotib olish birlamchi emas, muhimi, mashina uyda yoki ko‘chada tez-tez quvvatlantirib turilsa bas.

Demak, elektromobil haydovchilari uch xil bo‘larkan:

Birinchi toifa: mashina akkumulatorining quvvati tugab qolishidan cho‘chib, tinmay quvvat ko‘rsatkichini tekshirib boruvchilar. Bunday haydovchilar birinchi duch kelgan «zapravka»ga albatta kirib o‘tishadi.

Ikkinchi toifa: mashinasining quvvati yo‘lda tugab qolishining oldini olish uchun, yo‘lga chiqishdan oldin masofani chamalovchilar.

Uchinchi toifa: uyiga yoki ishxonasiga borishi bilan mashinasini darhol tokka ulab qo‘yishni odat qilganlar.