Qoraqalpog‘istonda 6 million yevroga Golland issiqxonasi qurilmoqda

Qoraqalpog‘istonning Nukus shahri yaqinida Gollandiyaning Dalsem kompaniyasi pomidor yetishtirish uchun maydoni 2,7 gektarga teng bo‘lgan issiqxona qurmoqda. Qiymati olti million yevroga teng bo‘lgan loyihani joriy yilning avgust oyi oxiriga qadar yakunlash rejalashtirilmoqda. Bu haqda AgroWorld Uzbekistan 2018 13-xalqaro ko‘rgazmasida kompaniya menejeri Farhod Rahmatov ma’lum qildi.

Issiqxonada gidroponika tizimi qo‘llaniladi, sabzavotlar maxsus osma lotoklarda yetishtiriladi. Qurilma balandligi yetti metrga yaqin bo‘ladi. Issiqxonalarda isitishning bir necha bosqichi qo‘llaniladi.

Changlatish asalarilar yordamida amalga oshiriladi, bu ekologik toza mahsulot olish imkonini beradi. Barcha tizimlar o‘simliklar uchun optimal mikroiqlim yaratish uchun o‘ylab chiqilgan.