Toshkentda tibbiyot xodimlariga minnatdorchilik aks etgan bannerlar paydo bo‘ldi (foto)

^{Foto: «Afisha.uz»}
Koronavirusning birinchi to‘lqini vaqtida butun dunyo bo‘ylab odamlar tibbiyot xodimlarga minnatdorchilik bildirish uchun birlashdi. Bunda derazalardan turib qarsaklar chalindi, yorqin graffitlar va asfaltlarga «Rahmat!» so‘zlari chizildi.

Masalan, Moskvadagi «Kosmos» mehmonxonasi binosida «Shifokorlarga rahmat» jumlasi paydo bo‘ldi. Mehmonxona ishchilari derazalardagi chiroqlarni yoqib, koronavirusga qarshi kurashayotgan tibbiyot xodimlariga ushbu minnatdorchilik so‘zi paydo bo‘lishiga yordamlashdi.

^{Foto: «Afisha.uz»}
Toshkentda esa «Yuksalik» umummilliy harakati tashabbusi bilan Humo Arena fasadida «O‘zbekiston shifokorlariga rahmat» mavzusida aksiya-fleshmob o‘tkazildi.

^{Foto: «Afisha.uz»}
«Afisha.uz»ning yozishicha, 30 iyul kuni esa poytaxtning turli nuqtalarida joylashgan bilbordlarda koronavirusga qarshi kurashayotgan shifokorlarga minnatdorchilik bildirilgan maketlar paydo bo‘lgan.

^{Foto: «Afisha.uz»}
Telegram’dagi «Hozir hammasi bo‘ladi» reklama kanali asoschisi Vitaliy Xalzunov ushbu bannerlarning orginal variantini bepul tarmoqqa joylab, bo‘sh yotgan bilbord egalarini ushbu minnatdorchilik so‘zlarini joylashtirishga chaqirdi.

^{Foto: «Afisha.uz»}
«Reklamachi do‘stlar, bilaman, bu yerda ko‘psizlar, shaharda ham bo‘sh yotgan konstruksiyalar ko‘p. Bugungi kunning bosh qahramonlari va butun vaziyatni qo‘llab-quvvatlash yo‘lida bo‘sh yotgan bilbordlarga biror nima joylashtiring. Konstruksiya shundoq ham bekor turibdiku.

Arial shrifda yozilgan ‘Rahmat’ so‘zi — bu hech narsa bo‘lmaganidan yaxshiroq», — deydi u