De Bryuyne 2026-yilgi Jahon Chempionatini oʻtkazib yuborishi mumkin

Belgiya terma jamoasi yarim himoyachisi Kevin de Bryuyne oʻtgan dam olish kunlari "Inter" darvozasiga penalti urayotib jiddiy jarohat oldi. Belgiyalik futbolchiga muvaffaqiyatli operatsiya qilinib, bu haqda "Napoli" klubi kecha xabar berdi.

The Sun nashrining yozishicha, De Bryuyne atrofidagilar jarohatdan tiklanish uzoq davom etishi mumkinligidan xavotirda. Shu sababli futbolchi 2026-yilgi Jahon Chempionatida Belgiya terma jamoasi safida maydonga tusha olmasligi ehtimoli mavjud.

Avvalroq De Bryuyne jarohatdan toʻliq tiklanishi uchun taxminan toʻrt oy vaqt kerak boʻlishi, u bahor boshida safga qaytishi mumkinligi xabar qilingan edi. Hozirda "Napoli" Italiya chempionatining turnir jadvalida yetakchilik qilmoqda.