Mourinyo Arbeloa haqida u mening eng yaxshim emasdi dedi
Chorshanba kuni Chempionlar ligasining 8-turi doirasida "Benfika" va "Real" maydonga tushadi. Uchrashuv oldidan "burgutlar" bosh murabbiyi Joze Mourinyo matbuot anjumanida madridliklar ustozi Alvaro Arbeloa haqida fikr bildirdi. Bu haqda euro-football.ru xabar beradi.
Mourinyo Arbeloa bilan avval "Real"da futbolchi sifatida birga ishlaganini eslatdi. Uning aytishicha, insoniy fazilatlari, shaxsiy munosabat va hamdardlik nuqtayi nazaridan Arbeloa murabbiy sevib ishlagan futbolchilardan biri bo'lgan.
"Albatta, u "Real"dagi eng yaxshi futbolchim emasdi, biroq o'sha paytda mening qo'lim ostida o'ynagan eng yaxshi insonlardan biri edi. Men bosim o'tkaza oladigan oxirgi odam ham aynan u bo'lardi. Alvaroning murabbiylik faoliyati ajoyib bo'lishiga umid qilaman", — dedi Mourinyo jurnalistlarga.
Ma'lumot uchun, Alvaro Arbeloa yaqinda iste'foga chiqarilgan Xabi Alonsoning o'rnini egallab, "Real"ni qabul qilib olgan.
