Dani Olmo Barselonada Fermin bilan raqobat haqida gapirdi

“Barselona”ning hujumkor yarim himoyachisi Dani Olmo asosiy tarkib uchun Fermin Lopes bilan kechayotgan kurash borasida fikr bildirdi. Bu haqda euro-football.ru xabar beradi.

So‘nggi haftalarda har ikki futbolchi ham yuqori saviyada o‘yin ko‘rsatayotgani sababli bosh murabbiy Hans-Diter Flik uchun kimga ko‘proq ishonch bildirish masalasi oson emas.

Olmoning aytishicha, ular go‘yoki bitta pozitsiya uchun raqobatlashayotgandek ko‘rinsa-da, bu jamoa ichida hech qachon muammo bo‘lmagan. Aksincha, so‘nggi paytlarda Olmo va Fermin maydonda birga ko‘proq paydo bo‘layotganini ta’kidladi. “Biz birga o‘ynashga 100% mos ekanimizni isbotladik. U bilan o‘yin vaqtini bo‘lishayotganimdan xursandman”, — dedi Olmo Managing Barca nashriga.

27 yoshli ispaniyalik futbolchi oxirgi ikki uchrashuvda 2 ta gol urib, 1 ta golli uzatma muallifi bo‘ldi.