O‘zbekiston futzalchilari Avstraliya ustidan irodali g‘alabaga erishdi
O‘zbekiston futzal terma jamoasi Osiyo Kubogi “C” guruhidagi 2-tur bahsida Avstraliyaga qarshi maydonga tushib, jangovor o‘yinda 4:2 hisobida g‘alaba qozondi. Uchrashuv Jakartadagi “Indoneziya Arena”da bo‘lib o‘tdi.
Bahs juda tez sur’atda boshlandi. Avstraliyaliklar 8-daqiqada Jiden Harbning goli bilan hisobni ochdi. E’tiborli tomoni, o‘sha daqiqaning o‘zida o‘zbekistonliklar ham javob qaytarib, Anasxon Rahmatov hisobni tenglashtirdi. Biroq raqib jamoa hujumdan to‘xtamay, 9-daqiqada Harbning ikkinchi goli orqali yana oldinga chiqib oldi.
Shundan keyin O‘zbekiston o‘z o‘yinini topdi. 11-daqiqada Ixtiyor Ropiyev muhim gol urib, hisobni 2:2 qildi. 19-daqiqada esa Ilhom Hamroyevning aniq zarbasi jamoamizni ilk bor hisobda oldinga olib chiqdi — 3:2.
Ikkinchi bo‘limda ham terma jamoamiz tartibli o‘yin namoyish etib, raqibning bosimini so‘ndirdi va vaziyatni nazoratda ushladi. Uchrashuv yakunida Muzaffar Ahadjonov 37-daqiqada gol urib, O‘zbekistonning g‘alabasini rasmiylashtirdi — 4:2.
Osiyo kubogi. S guruhi. 2-tur
Avstraliya — O‘zbekiston 2:4
Gollar: Yakob Harb (8, 9) — Anasxon Rahmatov (9), Ixtiyor Ropiyev (11), Ilhom Hamroyev (19), Muzaffar Ahadjonov (37).
O‘zbekiston — 12.Abbos Elmurodov, 4.Ixtiyor Ropiyev, 6.Ilhom Hamroyev, 9.Elbek To‘lqinov, 10.Shahram Faxriddinov
Zahiradagilar: 1.Shavkat Ibragimov, 2.Anasxon Rahmatov, 3.Abror Ahmedzyanov, 5.Sunnatilla Jo‘rayev, 7.Akbar Usmonov, 8.Xayrullo Solixov, 11.Muzaffar Axadjonov, 13.Eldor Nigmatov, 14.Samariddin Berkinov.
Ogohlantirish: Shahram Fahriddinov (10).
Chetlatish: Jiovenali (39).
Shu tariqa, “C” guruhidagi navbatdagi uch ochko qo‘lga kiritildi va terma jamoamiz pley-off uchun kurashda juda muhim qadam tashladi. Muxlislar uchun bu uchrashuvning asosiy xulosasi bitta: jamoa xarakter ko‘rsatdi, zarba yegan joyidan tez turib ketdi va g‘alabani tortib oldi.
