Jikiya Antalyaspor'dagi holati haqida qisqa izoh berdi

«Antalyaspor» himoyachisi Georgiy Jikiya Turkiyadagi faoliyati borasida savollarga javob berdi. 32 yoshli futbolchining bu boradagi fikrlari «FNL s Ilyovym» telegram-kanalida e’lon qilingan videoda keltirildi. Bu haqda euro-football.ru xabar beradi.

Jikiyadan klubdagi ishlari qanday ketayotgani so‘ralganda, u hammasi joyida ekanini aytdi. Turkiyadagi sharoit va muhit ham uni to‘liq qoniqtirayotganini futbolchi tabassum bilan qo‘shimcha qildi.

Georgiy Jikiya «Antalyaspor» safiga o‘tgan yozda kelib qo‘shilgandi. Shundan beri u 13 o‘yinda maydonga tushib, 2 ta gol urdi.

Hozirda «Antalyaspor» Turkiya Superligasi turnir jadvalida 14-o‘rinda bormoqda. Jamoa navbatdagi uchrashuvini 13-fevral kuni o‘z maydonida «Samsunspor»ga qarshi o‘tkazadi.