Stability AI olti daqiqalik qoʻshiqlar yarata oladigan yangi modelni taqdim etdi
Stable Diffusion yaratuvchisi boʻlgan Stability AI kompaniyasi Stability Audio 3.0 deb nomlangan yangi audio modellar oilasini eʼlon qildi. Kompaniyaning taʼkidlashicha, ushbu seriyadagi eng ilgʻor model olti daqiqadan ortiq davom etadigan professional darajadagi musiqalarni generatsiya qilish imkoniyatiga ega. Yangi oila toʻrtta modelni oʻz ichiga oladi: small SFX, small, medium va 2.7 milliard parametrga ega boʻlgan large modeli. Bu haqda Techcrunch.com xabar beradi.
Kichik modellar qurilmalarning oʻzida ikki daqiqagacha boʻlgan tovush va musiqalarni yaratishga moʻljallangan. Medium va large versiyalari esa 6 daqiqa 20 soniyalik toʻliq kompozitsiyalarni yarata oladi. Bu 2024-yilda chiqarilgan Stable Audio 2.0 imkoniyatlaridan ikki baravar koʻpdir. Stability AI kichik va oʻrta modellarini ochiq kodli (open weights) koʻrinishda taqdim etdi, bu esa foydalanuvchilarga ularni oʻzgartirish va shaxsiy maqsadlarda qoʻllash imkonini beradi.
Eng yirik model faqat API va pullik xizmatlar orqali foydalanish uchun ochiq. Shuningdek, daromadi 1 million dollardan oshadigan kompaniyalar korporativ litsenziya olishlari talab etiladi. Hozirda Google va ElevenLabs kabi gigantlar ham musiqa generatsiyasi sohasida oʻz vositalarini ishlab chiqmoqda. Biroq, Suno va Udio bilan bogʻliq sud jarayonlari koʻrsatganidek, mualliflik huquqi va litsenziyalash masalasi ushbu xizmatlarning kelajagi uchun hal qiluvchi ahamiyatga ega.
Stability AI oʻzining yangi modellarini toʻliq litsenziyalangan maʼlumotlar asosida oʻqitganini maʼlum qildi. Kompaniya oʻtgan yili Warner Music Group va Universal Music Group bilan hamkorlik shartnomalarini imzolagan edi. Shuningdek, startap professional musiqachilar uchun yangi mahsulotlar toʻplamini ishlab chiqmoqda va bu yoʻnalishni boshqarish uchun Universal Audio sobiq rahbari Ethan Kaplan jamoaga qoʻshildi.
