Jek Grilish haydovchilik guvohnomasidan ayrilib qolishi mumkin
Avvalroq Jek Grilish jarohati sabab operatsiya stoliga yotishga majbur bo‘layotgani haqida xabar bergandik. Endi esa futbolchining muammolari yana ortdi: unga 12-sentabr kuni sodir bo‘lgan voqea bo‘yicha jarima masalasi qayta ko‘tarildi. Bu haqda euro-football.ru xabar beradi.
O‘sha kuni Grilish Liverpulda o‘zining Lamborghini avtomobilida svetoforning taqiqlovchi qizil chirog‘ida to‘xtamasdan o‘tib ketgan. Qoidabuzarlik tungi paytda sodir bo‘lgani uchun rulda aynan kim bo‘lganini tasdiqlash bo‘yicha qo‘shimcha tartib-taomillar talab qilingan.
Politsiya Grilishga haydovchi shaxsini aniqlash uchun standart so‘rov yuborgan, biroq futbolchi belgilangan muddat ichida javob qaytarmagan. Natijada unga avtomatik jarima yozildi va jarima ballari ham qo‘shildi — endilikda Grilish bir muddat haydovchilik guvohnomasidan mahrum bo‘lib qolish xavfi ostida.
