Franchesko Totti Roma bilan muzokaralar ketayotganini tasdiqladi
Franchesko Totti “Roma”ga qaytishi mumkinligi haqidagi xabarlarga munosabat bildirdi. Avvalroq afsonaviy futbolchi klubda texnik direktor lavozimini egallashi ehtimoli haqida gap-so‘zlar tarqalgandi. Bu haqda euro-football.ru xabar beradi.
“Roma” — mening uyim, hozir u yerda bo‘lmasam ham. Klubning qanday yo‘ldan ketayotganidan mamnunman. So‘nggi paytlar ko‘p mish-mishlar yurdi. Bu rost: biz aloqadamiz, tafsilotlarni muhokama qilyapmiz va hamma uchun eng yaxshi yechimni topishga urinmoqdamiz. Umid qilamanki, bu masalani tez orada hal qilamiz”, — dedi Totti Sky Sport Italia’ga.
Totti futbolchilik faoliyatini 2017 yilda yakunlagan. Shundan so‘ng u bir necha yil davomida “Roma”da menejer sifatida ishlagan.
Qayd etish joiz, “Roma” bosh murabbiyi Jan Pyero Gasperini avvalroq hazillashib, kerak bo‘lsa Tottini maydonga ham tushirishga tayyorligini aytgandi.
