Noyer Dortmundga qarshi o'yinda maydonga tushib qolishi mumkin
Fevral o'rtalarida Manuel Noyer jarohat oldi va dastlab u uch haftacha safdan chiqdi, degan xabarlar tarqalgan edi. Biroq «Bavariya» sardori kutilganidan tezroq safga qaytishi ehtimoli paydo bo'ldi. Bu haqda euro-football.ru xabar beradi.
Bild nashri ma'lumotiga ko'ra, dushanba kuni Noyer darvozabonlar murabbiyi hamda reabilitatsiya bo'yicha mutaxassis bilan birga maydonda mashg'ulot o'tkazdi. U hozircha murakkab mashqlarni bajarmagan bo'lsa-da, to'p bilan ishlagani tiklanish jarayoni ijobiy ketayotganini anglatadi.
Germaniyada esa Noyer 28-fevral, shanba kuni Dortmundning «Borussiya»siga qarshi uchrashuvdayoq maydonga tushib, barchani hayratda qoldirishi mumkinligi haqida gap-so'zlar yurmoqda.
Hozir «Bavariya» Bundesligada peshqadam, ikkinchi o'rindagi «Borussiya» esa myunxenliklardan sakkiz ochkoga ortda qolmoqda.
