Fermin Lopes yana 11 golga yetib, rekordini takrorladi

O'tgan dam olish kunlari Kataloniyaning «Barselona» jamoasi Ispaniya chempionati autsayderlaridan biri «Levante»ni 3:0 hisobida mag'lub etdi. Uchrashuvda yarim himoyachi Fermin Lopes ham navbatdagi golini urib, mavsumdagi gollari sonini 11 taga yetkazdi. Bu haqda euro-football.ru xabar beradi.

Shu tariqa u «Barsa» safidagi shaxsiy samaradorlik rekordini qaytadan takrorladi: 2023/2024 yilgi mavsumda ham Lopes 11 bor raqib darvozasini ishg'ol qilgan. Ayni paytda esa oldinda hali yetarlicha o'yin bor va u bu ko'rsatkichni yaxshilash imkoniyatiga ega.

«Barselona» uchun esa bu g'alaba muhim ahamiyat kasb etdi: amaldagi Ispaniya chempioni o‘tgan hafta oxiridagi natijadan so‘ng turnir jadvalida yana yetakchilikni qaytarib oldi.