Atletiko Grizmanning ketishi haqidagi gaplarni rad etdi
Madridning «Atletiko» klubida Antuan Grizmanning kelajagi borasidagi mish-mishlarga munosabat bildirildi. Klub sport direktori Mateu Alemani hujumchi atrofidagi xabarlarni izohlab, ularning asossiz ekanini ta’kidladi. Bu haqda euro-football.ru xabar beradi.
Avvalroq OAVda 34 yoshli fransuz futbolchisi MLSdagi «Orlando Siti» klubiga yaqin ekani haqida ma’lumotlar tarqalgandi.
Alemanining aytishicha, bu gaplar oddiy spekulyatsiya xolos. «Antuanning oldinda yana ikki mavsumi bor, u oldidagi vazifalarga to‘liq e’tibor qaratgan, uning o‘yini ham juda yaxshi», — deya keltiradi Goal nashri.
Joriy mavsumda Grizmann barcha musobaqalarda «matraschilar» safida 36 uchrashuvda maydonga tushib, 12 ta gol urdi va 2 ta golli pas berdi. Hujumchining «Atletiko» bilan shartnomasi 2027 yil iyunigacha amal qiladi.
