Karpin o'rtoqlik o'yinlarida natijaga e'tibor bermaslikni aytdi

Rossiya terma jamoasi bosh murabbiyi Valeriy Karpin Mali va Nikaragua terma jamoalariga qarshi bo'ladigan o'rtoqlik uchrashuvlari oldidan fikr bildirdi. Bu haqda euro-football.ru xabar beradi.

Mutaxassisning ta'kidlashicha, bu bahslarda asosiy mezon natija emas. U terma jamoaga ishonch bildirayotgan va ko'rishni istayotgan barcha futbolchilarni chaqirishni rejalashtirmoqda. Karpin fors-major holatlar bo'lmasa, hamma futbolchi yig'inga yetib kelishiga umid bildirdi.

Rossiya - Nikaragua uchrashuvi 27 mart kuni Krasnodardagi stadionda o'tkaziladi. Mali bilan o'yin esa 31 mart kuni Sankt-Peterburgda bo'lib o'tadi.

Eslatib o'tamiz, FIFA va UEFA qaroriga ko'ra Rossiya terma jamoasi xalqaro musobaqalarda qatnashish huquqidan chetlatilgan.