OFK Osiyo Chempionlar Ligasi uchrashuvlarini BAA va Qatarda kechiktirdi

Osiyo futbol konfederatsiyasi (OFK) mintaqaviy Osiyo Chempionlar Ligasi doirasidagi ayrim bahslar boshqa sanalarga ko‘chirilganini ma’lum qildi. Uchrashuvlar Abu-Dabi, Dubay va Dohada o‘tkazilishi kerak edi. Bu haqda euro-football.ru xabar beradi.

Qarorga Eron, AQSh va Isroil o‘rtasidagi harbiy keskinlik sabab bo‘ldi. Xabarlarga ko‘ra, Eron tomonidan uchirilayotgan snaryadlar qo‘shni davlatlar hududiga ham yetib bormoqda, u yerda AQSh harbiy bazalari joylashgan.

OFK bayonotida tashkilot vaziyatni yaqindan kuzatishda davom etishi, futbolchilar, jamoalar, rasmiylar va muxlislar xavfsizligini ta’minlash masalasida qat’iy pozitsiyada qolishi ta’kidlandi.

O‘yinlar 2 va 3 mart kunlari bo‘lib o‘tishi kerak edi. Hozircha yangi sanalar yoki arenalar rasman e’lon qilinmadi.