Uli Hoeneß Jose Mourinho va Michael Olise borasidagi mish-mishlarga chek qoʻydi
Bavariya faxriy prezidenti Uli Hoeneß Germaniya kubogi finali arafasida Jose Mourinho haqida keskin fikr bildirdi. Berlin mezbonlik qilgan final oʻyiniga tashrif buyurgan portugaliyalik mutaxassis haqidagi savolga Hoeneß: "Umid qilamanki, u bilan uchrashib qolmayman, u bu safarni oʻtkazib yuborsa ham boʻlardi", — deya javob berdi Sky nashriga. Bu haqda Goal.com xabar beradi.
Mourinhoning Berlinga tashrifi uning Real Madrid klubiga qaytishi va Bavariya qanot hujumchisi Michael Olise bilan qiziqayotgani haqidagi xabarlar fonida yuz berdi. Biroq Hoeneß bu borada qatʼiy pozitsiyasini namoyish etdi: "U xohlagancha kuzatishi mumkin, buning foydasi yoʻq. Michael Olise sotilmaydi", — deya taʼkidladi 74 yoshli funksioner.
Bild nashri xabariga koʻra, Mourinho finalga Bavariya raqibi — VfB Stuttgart taklifiga binoan kelgan. Maʼlum qilinishicha, murabbiy Stuttgart sport direktori Fabian Wohlgemuth bilan uchrashuv belgilagan. Ushbu uchrashuvni Mourinhoning agenti Jorge Mendes boshqaradigan GestiFute agentligi tashkillashtirgan.
Hozirda Jose Mourinho Real Madrid klubiga qaytishi kutilmoqda. U yanvar oyida isteʼfoga chiqarilgan Xabi Alonso oʻrnini egallagan, biroq mavsum oxirida ketishi aniq boʻlgan Álvaro Arbeloa oʻrnini egallashi taxmin qilinmoqda. Shu sababli, bir qator yulduzlar, jumladan Olise ham Madrid klubi radariga tushgan.
Michael Olise xizmatlariga Real Madrid bilan bir qatorda Liverpul va Barselona ham qiziqish bildirmoqda. Shunga qaramay, Bavariya sport direktori Max Eberl va klub rahbariyati 24 yoshli futbolchini qoʻyib yubormoqchi emas. Myunxenliklarning asosiy yetakchilaridan biri boʻlgan Olise klub bilan 2029-yilgacha shartnomaga ega.
