Angliya Premer-ligasi 2025-26 mavsumi yakunlari: Gʻoliblar va magʻlublar
Angliya Premer-ligasining 2025-26-yilgi mavsumi yakshanba kuni oʻzining hayajonli yakuniga yetdi. Tottenxem jamoasi Everton ustidan qiyin gʻalabaga erishib, Vest Xem jamoasini quyi ligaga ravona qildi. Shu bilan birga, Angliya shimoli-sharqida Sanderlend sensatsiya koʻrsatib, Chelsi ustidan gʻalaba qozondi va Yevropa ligasi yoʻllanmasini qoʻlga kiritdi. Bu magʻlubiyat esa London klubini kelasi mavsumda har qanday qitʼa miqyosidagi musobaqalardan mahrum etdi. Bu haqda Goal.com xabar beradi.
Mamlakatning boshqa bir chekkasida Manchester Siti oʻzining afsonaviy va mislsiz muvaffaqiyatlarga erishgan murabbiyi Pep Guardiola bilan xayrlashdi. Xuddi shu vaqtda Liverpul tirik afsonasi Muhammad Salah ham "Enfild"dagi toʻqqiz yillik yorqin faoliyatiga yakun yasadi. Biroq eng katta hissiyotlar Selxerst Parkda kuzatildi: Arsenal muxlislari 22 yillik tanaffusdan soʻng jamoasining Angliya Premer-ligasi kubogini boshi uzra baland koʻtarganiga guvoh boʻlishdi.
Liverpulning chempionlik unvonini himoya qila olmagani va omadsiz mavsum oʻtkazganiga bir qancha sabablar bor, ammo standart vaziyatlardagi muammolar eng asosiysi boʻldi. Murabbiy Arne Slot mavsum yakunida taʼkidlaganidek, zamonaviy futbol oʻzgardi va "qizillar" bu oʻzgarishlarga moslasha olmagani uchun jazolandi. Jamoada maxsus standart vaziyatlar boʻyicha murabbiyning yoʻqligi ularga qimmatga tushdi.
2025-26-yilgi mavsum shuni koʻrsatdiki, burchak toʻplari, jarima zarbalari va autdan toʻp kiritishlar har qachongidan ham muhimroq ahamiyat kasb etmoqda. Angliyaning yuqori toʻrtta divizionida standart vaziyatlardan eng koʻp gol urgan jamoalar yakunda chempionlikni qoʻlga kiritgani ham bejiz emas. Endi Liverpul kelasi mavsumda taxtni qaytarib olishni istasa, yozgi transferlar oynasida Nicolas Jover kabi mutaxassislarni jalb qilishi shart boʻladi.
