8000 mAs batareya va 200 Mp Leica kamera: Xiaomi 17 Max sotuvga chiqdi
Xiaomi kompaniyasi Xitoy bozorida oʻzining yangi flagmani — Xiaomi 17 Max smartfonini rasman sotuvga chiqardi. Ushbu qurilma seriyadagi eng yirik model boʻlish bilan birga, rekord darajadagi 8000 mAs sigʻimli akkumulyator bilan jihozlangani bilan ham ajralib turadi. Smartfonning boshlangʻich narxi 12/256 GB talqini uchun taxminan 630 dollarni tashkil etmoqda. Bu haqda Ixbt.com xabar beradi.
Qurilma 6,9 dyuymli, 2K aniqlikdagi va 120 Gs yangilanish chastotasiga ega SuperPixel displeyi bilan taʼminlangan. Ekranning maksimal yorqinligi 3800 nitga yetadi, 3840 Gs chastotali ShIM texnologiyasi esa koʻz charchashining oldini oladi. Displey yuzasi mustahkam Dragon Crystal Glass 3.0 oynasi bilan himoyalangan.
Xiaomi 17 Max unumdorligi uchun eng soʻnggi Snapdragon 8 Elite Gen 5 protsessori masʼuldir. Kamera borasida ham qurilma yuqori koʻrsatkichlarga ega: Leica bilan hamkorlikda yaratilgan 200 Mp asosiy modul, 50 Mp periskop va 50 Mp oʻta keng burchakli obʼyektiv oʻrnatilgan. Bu esa foydalanuvchilarga professional darajadagi suratlarni olish imkonini beradi.
Smartfonning quvvat tizimi Jinshajiang texnologiyasi asosida yaratilgan boʻlib, u 100 vattli simli va 50 vattli simsiz tezkor quvvatlanishni qoʻllab-quvvatlaydi. Qurilma White, Sky Blue va Pixel Black ranglarida taqdim etilgan hamda IP68 standarti boʻyicha suv va changdan himoyalangan.
