Kechikkan Trump Phone smartfoni atrofida mojaro: AQSH bayrogʻida xatolik topildi

Toʻqqiz oylik kechikishdan soʻng, nihoyat bozorga Trump Phone smartfoni chiqdi. Oltin qoplamali va 500 dollar narxga ega ushbu qurilma premium segment vakili sifatida taqdim etilmoqda. Biroq, kutilgan vatanparvarlik ramzi oʻrniga, qurilma dizaynidagi qoʻpol xatolik sababli tanqidlar markaziga tushdi. Bu haqda Ixbt.com xabar beradi.

Ijtimoiy tarmoq foydalanuvchilari smartfonning orqa panelida tasvirlangan AQSH bayrogʻida 13 ta chiziq oʻrniga 11 ta chiziq borligini payqab qolishdi. Garchi 50 ta yulduz oʻz oʻrnida boʻlsa-da, chiziqlar sonidagi xatolik rasmiy davlat bayrogʻi dizayniga zid keladi va bu holat internetda koʻplab masxaralarga sabab boʻldi.

Bundan tashqari, loyiha boshida marketingda faol qoʻllanilgan "Made in USA" maqomi ham yoʻqolgan. Trump Mobile vakillarining soʻzlariga koʻra, qurilma AQSHda faqat qisman yigʻiladi, uning asosiy komponentlari esa xorijda ishlab chiqariladi. Bu holat ham foydalanuvchilar va ekspertlar tomonidan keskin tanqid qilinmoqda.