Rossiyada VPN-trafik uchun qoʻshimcha toʻlov joriy etish kuzgacha qoldirildi
Rossiya hukumati xalqaro internet-trafik uchun belgilangan 15 GB miqdoridan oshgan qismiga qoʻshimcha haq toʻlash tartibini joriy etishni kechiktirdi. Dastlab 1-iyundan kuchga kirishi kerak boʻlgan ushbu chora endilikda kuz oylariga yoki Davlat dumasi saylovlaridan keyingi muddatga koʻchirilishi mumkin. Bu haqda Ixbt.com xabar beradi.
Ushbu tashabbus VPN xizmatlaridan foydalanishga qarshi kurashish usuli sifatida koʻrilmoqda. Aloqa operatorlari bunday trafikni xalqaro deb tasniflaydi, demak, narxlarning oshishi aylanma yoʻllar orqali internetga kirishni kamaytirishi kutilgan edi. Biroq, mexanizmni amaliyotga tatbiq etish uchun vaqt yetarli boʻlmagani maʼlum boʻldi.
Telekom-bozoridagi manbalarning xabar berishicha, operatorlarga texnik tayyorgarlik koʻrish uchun yana 3–4 oy vaqt kerak. Asosiy muammo — tariflarni, jumladan, arxivdagi paketlarni yangilash va billing tizimlarini takomillashtirish bilan bogʻliq texnik murakkabliklardir.
Eng katta savol qaysi trafikni aynan "xorijiy" deb hisoblashda yuzaga kelmoqda. Masalan, Rossiyada oʻz serverlariga ega boʻlgan Google xizmatlari, korporativ VPN tarmoqlari yoki messenjerlardagi proksi-serverlar trafigini qanday hisobga olish hozircha aniq emas.
