Tong sahardagi muzlagan Starship: Muvaffaqiyatsiz parvozdan keyingi surat
SpaceX kosmodromidan olingan yangi suratda dunyodagi eng yirik raketa — Starship Flight 12 ning ikkinchi start maydonchasidan amalga oshirilishi kerak boʻlgan, biroq qoldirilgan parvozidan keyingi holati aks etgan. Surat "Moviy soat" (Blue hour) vaqtida, yaʼni quyosh chiqishidan oldingi gʻira-shira vaqtda olingan boʻlib, unda osmon va atrof-muhit chuqur koʻk rang hamda yumshoq yorugʻlik bilan qoplangan. Bu haqda Ixbt.com xabar beradi.
Raketa korpusida yonilgʻi quyish jarayonidan qolgan izlarni koʻrish mumkin. Starship kriogen yonilgʻi bilan toʻldirilganda, zanglamaydigan poʻlatdan yasalgan tashqi sirt haddan tashqari soviydi. Natijada atmosferadagi nam havo sovuq metall yuzasida bir zumda kondensatsiyalanib, oq qirov qatlamini hosil qiladi. Eslatib oʻtamiz, parvoz urinishi startga 40 soniya qolganida toʻxtatildi, biroq raketa bilan bogʻliq muammo yoʻq.
Nosozlik start minorasida aniqlangan boʻlib, uni kun davomida bartaraf etish rejalashtirilgan. Yangi parvoz urinishi kelayotgan tunda amalga oshirilishi kutilmoqda. Rejaga koʻra, Starship yuqori bosqichi 20 ta Starlink V3 sunʼiy yoʻldosh simulyatorini va kema issiqlik himoyasini suratga olish uchun moʻljallangan ikkita maxsus test yoʻldoshini orbitaga olib chiqadi.
SpaceX muhandislari korpus shikastlanganda yuklamalarni oʻrganish uchun issiqlik himoya plitalarining bir qismini oq rangga boʻyashgan va hatto bitta plitani ataylab olib tashlashgan. Shuningdek, koinotda Raptor dvigatelini qayta ishga tushirish va kemaning mustahkamlik chegaralarini tekshirish uchun ekstremal manevrlar oʻtkazish rejalashtirilgan.
Elon Musk taʼkidlashicha, Starship V3 versiyasining deyarli har bir detali avvalgi parvozlarda ishlatilgan V2 modelidan farq qiladi. Bu yangilangan Starbase start maydonchasidan amalga oshiriladigan ilk parvoz boʻladi. Raketa umumiy hisobda 20 ta maket va 2 ta modifikatsiya qilingan sunʼiy yoʻldoshni orbitaga chiqarishi kerak.
