Meta kompaniyasi Reddit analogi boʻlgan Forum ilovasini ishga tushirdi
Meta kompaniyasi Facebook Groups uchun moʻljallangan Forum nomli yangi mustaqil ilovani taqdim etdi. Kompaniya ushbu platformani Reddit kabi ishlovchi tizim sifatida koʻrmoqda va uni "chuqur muhokamalar, aniq javoblar va foydalanuvchilar uchun qadrli boʻlgan jamoalar uchun maxsus makon" deb taʼriflamoqda. Ilovani birinchilardan boʻlib ijtimoiy tarmoqlar boʻyicha ekspert Matt Navarra payqadi. Bu haqda Techcrunch.com xabar beradi.
Foydalanuvchilar Forum ilovasiga Facebook akkaunti orqali kirishlari mumkin. Tizim avtomatik ravishda foydalanuvchining guruhlari, profili va faoliyatini yuklab oladi. Shuningdek, xuddi standart Facebook ilovasida boʻlgani kabi, bu yerda ham taxallus (nickname) ostida postlar qoldirish imkoniyati mavjud. Meta vakillarining taʼkidlashicha, guruhlar Facebook platformasida ham saqlanib qoladi va Forum ilovasida ulashilgan har qanday maʼlumot asosiy tarmoqdagi guruhlarda ham koʻrinadi.
Ilovaning asosiy tasmasi guruhlardagi jonli suhbatlarga yoʻnaltirilgan boʻlib, foydalanuvchilarga faqat trenddagi mavzularni emas, balki real odamlarning fikrlarini koʻrish imkonini beradi. Forum tarkibiga sunʼiy intellekt asosida ishlovchi "Ask" (Soʻrash) boʻlimi ham kiritilgan. Bu funksiya orqali foydalanuvchilar turli guruhlardagi muhokamalardan jamlangan javoblarni olishlari mumkin. Shuningdek, guruh administratorlari uchun kontentni boshqarishda yordam beradigan AI-assistent ham joriy etilgan.
Bu Meta kompaniyasining guruhlar uchun alohida ilova chiqarish boʻyicha birinchi urinishi emas. 2014-yilda ham kompaniya Groups ilovasini ishga tushirgan, biroq u 2017-yilda yopilgan edi. Forum ilovasi Meta tomonidan soʻnggi haftalarda taqdim etilgan ikkinchi mahsulotdir. Oʻtgan oyda kompaniya Instagram doʻstlari bilan vaqtinchalik suratlarni ulashish imkonini beruvchi Instants ilovasini ham chiqargan edi.
The Wall Street Journal nashrining xabar berishicha, Mark Zuckerberg sunʼiy intellekt yordamida ish samaradorligini oshirish orqali kompaniya kelajakda yanada koʻproq ilovalar yaratishni rejalashtirayotganini maʼlum qilgan. Zuckerberg bosh mahsulot direktori Chris Cox bilan suhbatda hatto 50 ta yangi ilova yaratish imkoniyatlarini muhokama qilganini aytib oʻtgan.
