Los-Anjeles transport tizimiga qilingan kiberhujumda Eron ayblanmoqda

Xavfsizlik boʻyicha tadqiqotchilarning taʼkidlashicha, mart oyida Los-Anjeles transport tizimida (LACMTA) sodir boʻlgan kiberhujum ortida Eron tomonidan qoʻllab-quvvatlanadigan xakerlar turibdi. Isroilning Gambit Security startapi seshanba kuni eʼlon qilgan hisobotida ushbu xakerlar Eron Razvedka va davlat xavfsizligi vazirligi (MOIS) uchun ishlashini maʼlum qildi. Bu haqda Techcrunch.com xabar beradi.

Oʻzini "Ababil of Minab" deb ataydigan xaktivistlar guruhi avvalroq ushbu hujum uchun javobgarlikni oʻz zimmasiga olgan edi. Ular LACMTA tizimlaridan maʼlumotlarni oʻgʻirlab, soʻngra oʻchirib tashlaganliklarini daʼvo qilishgan. Gambit Security ekspertlarining fikricha, bu guruh oʻzlari aytganidek yangi yoki mustaqil jamoa emas, balki Eron hukumatiga aloqador tuzilmadir.

Gambit oʻz xulosalarini guruhni Eronning avvalgi kiberkampaniyalari bilan bogʻlovchi dalillarga, shuningdek, Isroil Milliy kiberdirektorligi tomonidan MOISga tegishli deb topilgan faoliyatga asoslagan. Shuningdek, tadqiqotchilar Isroil, Saudiya Arabistoni va Turkiyadagi kompaniyalarga qilingan boshqa hujumlarni ham oʻrganib chiqishgan.

Agar Gambit tahlillari toʻgʻri boʻlsa, "Ababil of Minab" Eron hukumati uchun ishlaydigan soxta xaktivist guruhlarning navbatdagisi boʻladi. Bunga misol sifatida AQSHning Stryker tibbiy texnologiyalar gigantiga hujum qilgan Handala guruhini keltirish mumkin. Keyinchalik FBI ushbu guruhning veb-saytlarini qoʻlga kiritgan va AQSH Adliya vazirligi Eronni ushbu hujumlar ortida turganlikda ayblagan edi.

Soʻnggi vaqtlarda Eron bilan bogʻliq xakerlar oʻz faolligini sezilarli darajada oshirgan. Aprel oyida AQSH agentliklari koalitsiyasi eronlik xakerlar Amerikaning muhim infratuzilmalarini nishonga olayotgani haqida ogohlantirish bilan chiqqan edi.