«Барселона» мен Испания құрамасының 18 жастағы шабуылшысы Ламин Ямаль ауыр жарақат алып, 2025-26 жылғы маусымда енді алаңға шыға алмайтын болды. Клуб дәрігерлері футболшының тізе асты сіңірі зақымдалғанын растады. Бұл жағымсыз жаңалық каталониялық клуб жанкүйерлері үшін күтпеген соққы болды. Бұл туралы Goal.com хабарлайды.
Дарынды вингер Ла Лига аясында сәрсенбі күні кешке өткен «Сельта Вигоға» қарсы ойында жарақат алды. Сол кездесуде «Барселона» 1:0 есебімен жеңіске жеткен болатын, алайда Ямаль ойынды мерзімінен бұрын аяқтауға мәжбүр болды. Медициналық тексеріс нәтижелері сауығу процесі ұзаққа созылатынын көрсетті.
Ламин Ямаль әлеуметтік желілер арқылы жанкүйерлеріне эмоцияға толы үндеу жолдады. «Қазіргі күйімді сөзбен айтып жеткізу қиын, бұл өте ауыр. Командама көмектесе алмайтыныма қатты өкінемін, бірақ алаңға бұрынғыдан да мықты болып оралуға уәде беремін», — деп жазды жас жұлдыз.
Биылғы маусымда Ямаль «көк-гранаттылар» сапында негізгі рөл атқарып жүрген еді. Оның қатардан шығуы жаттықтырушылар штабы үшін үлкен мәселе тудырады, себебі команда чемпионат жолындағы бәсекеде және халықаралық аренада шешімді кезеңге аяқ басты.
“Zamin”-ді Telegram-нан оқыңыз!
