«Barselona» va Ispaniya terma jamoasining 18 yoshli hujumchisi Lamin Yamal jiddiy jarohat olib, 2025-26 yilgi mavsumda boshqa maydonga tusha olmaydigan bo'ldi. Klub shifokorlari futbolchining tizza osti payi shikastlanganini tasdiqlashdi. Ushbu noxush xabar kataloniyaliklar muxlislari uchun kutilmagan zarba bo'ldi. Bu haqda Goal.com xabar beradi.
Iste'dodli vinger La Liga doirasida chorshanba oqshomida bo'lib o'tgan «Selta Vigo»ga qarshi bahsda jarohat oldi. O'sha uchrashuvda «Barselona» 1:0 hisobida g'alaba qozongan edi, biroq Yamal o'yinni muddatidan oldin yakunlashga majbur bo'ldi. Tibbiy ko'rik natijalari tiklanish jarayoni uzoq davom etishini ko'rsatdi.
Lamin Yamal ijtimoiy tarmoqlar orqali muxlislarga hissiyotlarga boy murojaat yo'lladi. «Hozirgi holatimni so'z bilan tushuntirib berish qiyin, bu juda og'riqli. Men jamoamga yordam bera olmasligimdan qattiq qayg'udaman, lekin kuchliroq bo'lib qaytishga va'da beraman», — deb yozdi yosh yulduz.
Joriy mavsumda Yamal «ko'k-anorranglilar» safida yetakchi rolini o'ynayotgan edi. Uning safdan chiqishi murabbiylar shtabi uchun jiddiy muammolarni keltirib chiqaradi, chunki jamoa chempionlik poygasida va xalqaro maydonlarda muhim pallaga kirib kelmoqda.
“Zamin”ni Telegramʻda oʻqing!
