Өзбекстан Президенті Шавкат Мирзиёев аграр сала өкілдерімен кездесуде келесі жылы Қытайдан 50 агродрон әкелінетінін мәлімдеді. Елдің әр өңірінде фермерлерге қызмет көрсету үшін кемінде екі мобильді дрон кешені ұйымдастырылады.
Сондай-ақ, дрондардың жүк көтеру көлемі 100 килограмнан 250 килограмға дейін арттырылатынын айтты. "Фермерлеріміз бен кластерлеріміздің санын ұлғайтып, олардың қызметіне цифрлық технологиялар мен жасанды интеллектті енгізіп, жоғары өнімділікке қол жеткізіп отырғаны мені қуантады", - деді президент.
Шавкат Мирзиёевтің айтуынша, Өзбекстанда жүздеген дронды пайдаланып, жер учаскелері мен егістіктерді мониторинг жасау жүзеге асырылған. Мемлекет басшысы Ауыл шаруашылығы министрлігі жанынан дрондар орталығы құрылғанын да атап өтті.
DK News порталының хабарлауынша, Қытайдың DJI компаниясы 2025 жылдың қараша айына дейін шетелге 200 мыңнан астам агродрон жеткізген. Аталған дрондар өсімдіктерді суару мен қорғау, сондай-ақ, мал шаруашылығы мен балық шаруашылығында қолданылуда.
