АҚШ Конгресси криптовалюта солиқ ислоҳотини кўриб чиқмоқда
АҚШ Конгрессининг бир гуруҳ қонунчилари криптовалюталарга солиқ солиш тизимини янгилашга қаратилган қонун лойиҳасини қайта тақдим этишди. Мазкур ҳужжат солиқ кодексини рақамли активлар соҳасидаги замонавий ҳолатларга мослаштиришни ва ИRS (АҚШ Ички даромадлар хизмати) томонидан кичик транзакциялар учун имтиёзларни таҳлил қилишни назарда тутади. Бу ҳақда Coindesk.com хабар беради.
Стивен Хорсфорд ва Макс Миллер бошчилигидаги депутатлар гуруҳи томонидан таклиф этилган "Паритй Акт" қонун лойиҳаси рақамли активларни ҳимоя қилиш, ҳисобдорлик ва инновацияларни тартибга солишни мақсад қилган. Янги таҳрирга кўра, тартибга солинадиган стейблкоинлар (стаблекоинс) билан боғлиқ операциялар, агар уларнинг таннархи қайтариб олиш қийматининг 99 фоизидан кам бўлмаса, фойда ёки зарар сифатида ҳисобланмайди.
Ҳужжатда, шунингдек, брокерлар орқали савдо қилиш учун "хавфсиз бандаргоҳ" яратиш, рақамли активларга нисбатан "ваш сале" қоидаларини қўллаш ва валидаторлик фаолияти орқали олинган даромадларни солиққа тортиш масалалари белгиланган. Энг муҳим жиҳатлардан бири — ИRS 200 доллардан кам бўлган кичик транзакциялар учун солиқ имтиёзлари (де минимис) жорий этиш имкониятини ўрганиши керак бўлади.
Крипто-индустрия вакиллари узоқ вақтдан бери кичик тўловларни, масалан, бир финжон кофе учун Bitcoin орқали ҳисоб-китоб қилишни солиқ ҳисоботларидан озод қилишни талаб қилиб келишмоқда. Бу чора криптовалюталарнинг кундалик тўлов воситаси сифатида оммалашишига хизмат қилиши кутилмоқда.
Конгрессмен Хорсфорднинг таъкидлашича, солиқ сиёсати рақамли активларнинг молия тизимидаги ўрнини белгиловчи пойдевордир. Ҳозирги солиқ кодекси эскирган бўлиб, у стейкинг мукофотлари, хайрия эҳсонлари ёки крипто-кредитлаш каби замонавий молиявий амалиётларни тўлиқ қамраб олмаган.
