Андрев Нг томонидан қўллаб-қувватланган ИрисГо сунъий интеллектли ёрдамчини тақдим этди
Соҳадаги экспертларнинг фикрича, сунъий интеллектнинг навбатдаги катта босқичи “проактив” тизимлар бўлади. Бу каби агентлар фойдаланувчининг эҳтиёжларини у ҳали англаб етмасидан олдин башорат қилади ва бажаради. Ушбу йўналишда пешқадамликка интилаётган ИрисГо стартапи жорий йил бошида Андрев Нг бошчилигидаги AI Фунд томонидан ажратилган 2,8 миллион долларлик инвестицияни жалб қилди. Компания шахсий компьютерлар учун фойдаланувчининг кундалик иш жараёнларини ўрганувчи ва уларни инсон аралашувисиз автоматлаштирувчи иш столи ёрдамчисини яратмоқда. Бу ҳақда Techcrunch.com хабар беради.
ИрисГо лойиҳасига Apple компаниясининг собиқ муҳандиси, Siri овозли ёрдамчисининг хитойча талқинини яратишда иштирок этган Жеффрей Лаи асос солган. Қизиғи шундаки, Ирис номи Siri сўзининг тескари ёзилишидан ҳосил бўлган. Тизимнинг асосий ғояси жуда оддий: Ирисга бирор амални бир марта кўрсатиш кифоя, у келажакда ушбу жараённи эслаб қолади ва қайта кўрсатма талаб қилмайди. Масалан, у онлайн қаҳва буюртма қилишдан тортиб, мураккаб бизнес вазифаларигача бўлган жараёнларни мустақил бажара олади.
Ирис тайёр “маҳоратлар” кутубхонаси билан таъминланган бўлиб, унга электрон почта қораламаларини ёзиш, ҳисоб-фактураларни қайта ишлаш, ҳисоботлар тузиш ва ҳужжатларни умумлаштириш каби функциялар киритилган. Шу билан бирга, у фойдаланувчининг иш столидаги хатти-ҳаракатларидан ўрганиб, янги вазифаларни ўз рўйхатига қўшиб боради. Шунингдек, илова ичида OpenAI Кодех ёки Anthropic томонидан тақдим этилган Claude Коде каби дастурчиларга ёрдам берувчи махсус код ёрдамчиси ҳам мавжуд.
Лойиҳа асосчиси Жеффрей Лаининг сўзларига кўра, асосий мақсад интеллектуал меҳнат ходимларини зерикарли ва такрорланувчи ишлардан халос қилишдир. ИрисГо маълумотларнинг катта қисмини қурилманинг ўзида қайта ишлашга мўлжалланган бўлиб, бу булутли технологияларга таянадиган бошқа иловаларга қараганда юқори махфийликни таъминлайди. Мазкур стартапни нафақат Андрев Нг, балки NVIDIA ва Google каби технологик гигантлар ҳам қўллаб-қувватламоқда.
