Қашқадарё ҳокимининг Шаҳрисабзга ташрифи ортидан масъуллар ҳайфсан олди

^{Фото: Қашқадарё ҳокимлиги}
Қашқадарё ҳокими Зоир Мирзаевнинг Шаҳрисабз шаҳрига ташрифи ортидан 10 апрель соат 00:01 дан эътиборан шаҳарга кириш-чиқиш тақиқланди. Бу ҳақда вилоят ҳокимлиги ахборот хизмати хабар бермоқда.

Маълум қилинишича, Зоир Мирзаев 9 апрель куни Шаҳрисабз шаҳри ва Яккабоғ туманида бўлган. Ҳоким ташрифи чоғида Амир Темур таваллудининг 684 йиллиги муносабати жонлиқ сўйилиб, Қуръон тиловат қилинган.

^{Фото: Қашқадарё ҳокимлиги}
Вилоят ҳокими ташрифи давомида Шаҳрисабз шаҳри ва Яккабоғ туманида карантин қоидаларига қай даражада амал қилинаётгани билан танишган. Ўрганиш жараёнида бир қатор камчиликлар аниқланган.

^{Фото: Қашқадарё ҳокимлиги}
Карантин қоидалари ва санитария чекловларига риоя қилиш юзасидан масъулиятсизлик қилган санитария-эпедимиологик осойишталик марказининг Шаҳрисабз шаҳар ва Яккабоғ тумани бўлими раҳбарлари Фахриддин Жуманов ҳамда Озода Эшқобиловага, шунингдек санитария-эпедимиология назорати инспекцияси Шаҳрисабз шаҳар ва Яккабоғ туман филиали раҳбарлари Қ.Худойқулов ва Ч.Қодировга ҳайфсан берилган.