1 декабрдан компьютер ўйинлари марказлари фаолиятига рухсат берилади

Республика махсус комиссияси қарорига биноан, шу йилнинг 1 декабридан Ўзбекистонда компьютер ўйинлари марказлари фаолиятига рухсат берилади. Соғлиқни сақлаш вазирлиги матбуот хизмати хабар қилишича, бундан кўзланган мақсад – электрон спортни ривожлантириш.

Компьютер ўйинлари марказлари фаолиятида қуйидаги санитария-эпидемиологик қоидаларга қатъий риоя қилиниши белгилаб қўйилди:

• фуқароларни алоҳида, бир-биридан ажратилган ҳолда, столлар оралиғида ижтимоий масофани таъминлаган ҳолда жойлаштириш;
  
• ходимларнинг тиббий ниқоб ва тиббий қўлқоплардан фойдаланиши, ижтимоий масофани сақлаши;
  
• ҳар бир фуқаронинг тана ҳароратини ўлчаб, 37 С ва ундан юқори бўлган, инфекция аломатлари мавжуд ҳолатда ҳамда тиббий ниқобда бўлмаган ҳолларда объектга киритмаслик чораларини кўриш;
  
• ҳар бир мижоздан кейин стол ва бошқа жиҳозларнинг юза қисмини дезинфекцион воситалар билан тозалаш.