Скоулз Ливерпулнинг инқирозида Слотни айблади

Англия терма жамоасининг собиқ футболчиси Пол Скоулз "Ливерпул" жамоасининг жорий мавсумдаги муваффақиятсизликлари сабабини кутилмаган омил билан изоҳлади. Арне Слот бошчилигидаги жамоа сўнгги 11 та ўйинда саккиз марта мағлубиятга учради.

"Ҳаммаси ўтган мавсум охирларида бошланган эди – эслайсизми, улар чемпион бўлишганди? Инқироз улар Ибизага ёки шунга ўхшаш жойга кетганида бошланган.

Арне Слот у ерда диджейлик қилган. Менимча, бу муносиб эмас", – деди Скоулз "The Good, The Bad and The Football" подкастида.

Англия чемпионатининг 12-туридан сўнг "Ливерпул" 18 очко тўплаб, турнир жадвалида 12-ўринни эгаллаб турибди. Чоршанба куни "Ливерпул" Чемпионлар лигаси гуруҳ босқичининг бешинчи турида ПСВ билан ўйнайди.