Вальдепеньяс Алонсо даврида Реал тарбияланувчилари орасида биринчи бўлди

Мадриднинг “Реал” клуби якшанба куни “Алавес”га қарши ўйинда 19 ёшли ҳимоячи Виктор Вальдепеньясни асосий жамоа сафида илк бор майдонга туширди. У 78-дақиқагача ўйнаб, “қаймоқранглилар”нинг сафардаги 2:1 ҳисобидаги ғалабасига ҳисса қўшди.

Эътиборлиси, Вальдепеньяс Хаби Алонсо бош мураббийлигидаги даврда клуб академиясидан етишиб чиққан футболчилар орасида асосий жамоада дебют қилган биринчи ўйинчи бўлди. Бунгача у “Реал”нинг катта жамоасида ҳатто захирадан ҳам ўйинга тушмаган.

Хаби Алонсо жорий йил ёз бошида “Реал” бошқарувини қабул қилиб олди. У Бразилия миллий терма жамоаси бош мураббийлигига тайинланган Карло Анчелоттининг ўрнини эгаллади.

Мадридликлар чоршанба куни Испания Кубогида “Талавера”га қарши баҳс ўтказади.