«Реал» Карвахаль бўйича қарор қабул қилди

Мадриднинг «Реал» клубида ўнг қанот ҳимоячиси Дани Карвахаль жорий мавсум якунида жамоани тарк этади. Бу ҳақда El Nacional хабар берди.

Манбага кўра, «қироллик» клуби раҳбарияти ҳимоячига янги меҳнат шартномасини таклиф қилишни режалаштирмаяпти. Карвахальнинг «қаймоқранглилар» билан амалдаги шартномаси 2026 йил июн ойи охирида якунланади.

33 ёшли испаниялик футболчи 2013 йил ёзидан бери «Реал» сафида ўйнаб келмоқда. Карвахальнинг бозор қиймати 7 миллион еврога баҳоланмоқда.

Испания чемпионатининг жорий мавсумида ҳимоячи 7 та ўйинда майдонга тушди ва голга бевосита таъсир кўрсатадиган натижа қайд этмади. «Реал» Ла Лига турнир жадвалида иккинчи ўринда бормоқда.