Пьянич «Ювентус»нинг жадвалдаги кўтарилишидан ҳайратланмади

«Ювентус»нинг собиқ ярим ҳимоячиси Миралем Пьянич Турин клубининг Лучано Спаллетти қўл остидаги натижалари ҳақида фикр билдирди. Бу ҳақда euro-football.ru хабар беради.

Пьяничнинг айтишича, жамоанинг турнир жадвалида юқорилаши уни ажаблантирмаган. У Спаллетти келиши билан бундай ўсишни кутганини таъкидлади: тажрибали мураббий юқори даражада натижа кафолати бўлиб, у билан тенглаша оладиганлар кўп эмас.

Спаллетти жорий йил октябрь ойи охирида «Ювентус»ни қабул қилиб олган. А Серияда 17 турдан сўнг туринликлар 32 очко билан бешинчи ўринда бормоқда, пешқадамдан ортда қолиш эса атиги тўрт очкони ташкил этади.