Семенё трансфери «Бристол Сити»га 12 млн евро олиб келди

Бугун, 9 январ куни, «Манчестер Сити» «Борнмут» вингери Антуан Семеньони ўз сафига қўшиб олганини расман эълон қилди. Бу ҳақда euro-football.ru хабар беради.

Келишув қиймати 72 миллион еврони ташкил этди. Гана терма жамоаси футболчиси билан шартнома 2031 йил 30 июнгача мўлжалланган.

The Times хабарига кўра, бу трансфердан «Бристол Сити» ҳам фойда кўрди — клуб тахминан 12 миллион евро ишлаб олди. Бунга сабаб, 2023 йилда Семенё «Борнмут»га 10 миллион еврога ўтганида шартномага футболчини кейинги сотувдан улуш бериш банди киритилгани.

Жорий мавсумда Антуан Семенё барча мусобақаларда 21 учрашувда майдонга тушиб, 10 та гол урди ва 3 та голли узатмани амалга оширди.