«Торино» 90-дақиқада қутулиб, «Фиорентина»ни пастда қолдирди
А Сериянинг 24-турида «Фиорентина» ўз майдонида «Торино»ни қабул қилди ва учрашув якунида 2:2 ҳисобидаги дурангга рози бўлди. Мезбонлар ғалабага жуда яқин келган бўлса-да, сўнгги лаҳзалардаги гол уларга қимматга тушди — флоренсияликлар барибир тушиб кетиш зонаси атрофидаги босимдан қутула олмади. Бу ҳақда euro-football.ru хабар беради.
Баҳснинг бошида Моизе Кин яхши вазиятга эга бўлди, бироқ 10-дақиқадаги уринишида дарвозани нишонга ола олмади. Тайм ўрталарда эса «Торино» ҳисобни очди: Чезаре Казадей Эмирҳон Илҳоннинг узатмасини якунлаб, Де Хеа посбонлигини таслим қилди — 0:1. «Фиорентина» жавоб қайтаришга уринди, Альберт Гудмундссон узоқдан хавфли зарба йўллади, аммо тўп устундан сал наридан ўтиб кетди.
Иккинчи бўлимда флоренсияликлар босимни оширди, Мандрагора ва Кин қулай имкониятлардан фойдалана олмади. 51-дақиқада Манар Соломон жарима майдони ташқарисидан аниқ зарба билан мувозанатни тиклади — 1:1. Орадан олти дақиқа ўтиб, Кин Жек Харрисоннинг пасидан сўнг гол уриб, мезбонларни олдинга олиб чиқди — 2:1.
Учрашув тақдири қўшимча дақиқаларда ҳал бўлди: 90+4-дақиқада Гвидас Гинейтис жарима майдонига аниқ тўп узатди, Гильермо Марипан эса бош билан зарба бериб, «Фиорентина»ни шок ҳолатига солди — 2:2. Шу тариқа «Торино» 13-ўринда қолди, «Фиорентина» эса турнир жадвалида пастки учлик яқинида қолишда давом этди.
