«Болонья» Сантьяго Кастро билан шартномани узайтирди

Аргентиналик ҳужумчи Сантьяго Кастро «Болонья» билан ҳамкорликни давом эттирадиган бўлди. Италия клуби матбуот хизмати футболчининг янги келишуви расмийлаштирилганини маълум қилди. Бу ҳақда euro-football.ru хабар беради.

21 ёшли форвард билан тузилган янги шартнома 2030 йилнинг ўрталаригача мўлжалланган. Кастро «Болонья» сафида 2024 йил январидан бери тўп суриб келмоқда.

Жорий мавсумнинг биринчи қисмида у 31 та учрашувда майдонга тушиб, 8 та гол ва 2 та голли узатма муаллифига айланди.

А Серияда 24 турдан сўнг «Болонья» 30 очко жамғариб, турнир жадвалида 10-ўринни эгаллаб турибди. Жамоа навбатдаги ўйинини 15 февраль куни сафарда «Торино»га қарши ўтказади.