Итурральде Вальверде эпизодини қизил карточка деб баҳолади
FIFA тоифасидаги собиқ ҳакам Итурральде Гонсалес «Бенфика»нинг UEFAга ҳакамлик бўйича эътирози юзасидан фикр билдирди. Чемпионлар лигаси плей-оффида Мадриднинг «Реал»ига қарши ўйинда 82-дақиқада Федерико Вальверде Самуйел Далга зарба берган вазиятда ҳакам футболчини майдондан четлатмади. Бу ҳақда euro-football.ru хабар беради.
Итурральдега кўра, бу эпизодда қарор қатъий бўлиши керак эди. «Бу қизил карточка. У ҳеч қандай сабабсиз зарба берди. Рақибга тўлиқ текмаган бўлса ҳам, Вальвердени майдондан ҳайдаш лозим эди», — дея собиқ арбитрнинг сўзларини AS нашри келтирди.
«Бенфика» — «Реал» учрашуви Европа Чемпионлар лигаси плей-офф босқичи доирасида ўтди. Мадрид жамоаси Винисиус Жуниорнинг голи эвазига 1:0 ҳисобида ғалаба қозонди. Жавоб баҳси 24 февраль куни бўлиб ўтади.
