Радимов Италия терма жамоаси даражасини паст баҳолади

Санкт-Петербургнинг «Зенит» клубида тўп сурган собиқ ярим ҳимоячи, ҳозирда футбол мутахассиси сифатида фаолият юритаётган Владислав Радимов Италия футболи ҳолати ҳақида фикр билдирди. Бу ҳақда euro-football.ru хабар беради.

Радимовнинг айтишича, Италия футболи инқироз даврини бошдан кечирмоқда: терма жамоа жаҳон чемпионатига чиқмай қолиш хавфи остида. Унинг таъкидлашича, клублар легионерлар ҳисобига маълум даражада натижа қилаётган бўлса-да, терма жамоанинг умумий савияси паст. Мутахассис бу фикрларни «Match TV» эфирида билдириб ўтди.

Эслатиб ўтамиз, Италия терма жамоаси 2026 йилги жаҳон чемпионатига тўғридан-тўғри йўлланма ола олмади. Дженнаро Гаттузо бошчилигидаги жамоа энди плей-офф учрашувлари орқали йўлланма учун кураш олиб боради.

Мундиал 2026 йил ёзида Шимолий Америкада ўтказилади. Нуфузли турнирга АҚШ, Канада ва Мексика мезбонлик қилади.