Бўстонлиқда Акбар Жўраев номидаги оғир атлетика мактаби очилди
Бугун, 25 март куни Бўстонлиқ туманида Акбар Жўраев номидаги оғир атлетика спорт мактабининг очилиш маросими тантанали тарзда ўтказилди. Бу ҳақда МОҚ матбуот хизмати хабар берди.
Тадбирда спорт соҳаси ва жамоатчилик вакиллари, шунингдек бир қатор ташкилот раҳбарлари иштирок этишди. Улар Ўзбекистон касаба уюшмалари федерацияси кўмагида барпо этилган ушбу замонавий иншоотнинг келгусида иқтидорли спортчиларни кашф қилиш ва уларни халқаро мусобақаларга тайёрлашда муҳим роль ўйнашини таъкидлашди.
Мажмуада кенг машғулотлар зали, малакали мураббийлар ва тиббиёт хонаси, қулай ётоқхона, замонавий ошхона, кичик стадион ҳамда бошқа зарур ҳажмдаги шароитлар мавжуд.
Расмийлар эса ушбу иншоот Президент қарори ижросини таъминлаш мақсадида қурилганини ва келгусида Акбар Жўраевдек ўзбек спортининг янги юлдузлари етишиб чиқишида хизмат қилишига умид билдирдилар.
Таҳлилчилар фикрича, Бўстонлиқда очилган спорт мактаби нафақат маҳаллий, балки халқаро миқёсда ҳам спорт салоҳиятини ривожлантиришда муҳим қадам бўлади.
