“Манчестер Юнайтед”да катта тозалаш: 5 футболчини ҳайдаш талаб қилинди
“Манчестер Юнайтед”нинг собиқ ярим ҳимоячиси Пол Скоулз клуб таркибида кимлар билан хайрлашиш кераклиги ҳақида ўз фикрларини билдирди. Унингча, жамоа айрим футболчилардан воз кечиб, янги босқичга ўтиши зарур.
Скоулз “шубҳали рўйхат”ига Люк Шоу ва Харри Магуайр билан бирга Мануэль Угарте, Жошуа Зиркзе ҳамда Мэйсон Маунтни киритди. У бу футболчиларнинг барчаси юқори даражада барқарор ўйин кўрсата олмаяпти, деб ҳисоблайди.
— “Магуайрга тўлиқ ишониш мумкинми, бу менда катта савол остида. Айниқса, жамоа Чемпионлар лигасида чемпион бўлишни истаса. Шоу эса кам майдонга тушади ва у ҳозир дунё топ даражасидаги ҳимоячи эмас. Маунт яхши футболчи, лекин тез-тез жароҳат олади”, — деди Скоулз.
Шу билан бирга, “Манчестер Юнайтед”да вазият секин-аста ижобий томонга ўзгармоқда. Вақтинчалик бош мураббий сифатида Майкл Кэррик келганидан кейин жамоа ўз ўйинини тиклай бошлади ва Премьер-лигада учинчи ўринга кўтарилди.
Ҳозирги ҳолатга кўра, клуб келаси мавсум учун УЕФА Чемпионлар лигаси йўлланмасини қўлга киритиш учун жиддий кураш олиб бормоқда. Шунингдек, раҳбарият ёзги трансфер ойнасидан олдин доимий бош мураббий масаласини ҳал қилиб, кейин таркибни тубдан янгилашни режалаштирмоқда.
