Де Лаурентис футбол қоидаларини кескин ўзгартиришни таклиф қилди

“Наполи” президенти Аурелио Де Лаурентис замонавий футбол қоидаларига жиддий ва кенг қамровли ўзгартишлар киритиш зарурлигини таъкидлади. Унинг фикрича, ҳозирги футбол форматини ёш авлод учун етарлича қизиқарли ва жозибадор деб бўлмайди.

The Athletic манбасига кўра, клуб раҳбари ўйинни янада тез, динамик ва томошабоп қилиш ғоясини илгари сурмоқда.

Де Лаурентиснинг асосий таклифларидан бири — таймлар давомийлигини 45 дақиқадан 25 дақиқагача қисқартириш. Унингча, бу жамоаларни юқори тезликда ўйнашга мажбур қилади ва ўйин сифати ҳамда кескинлигини оширади.

Шунингдек, у симуляция ва атайлаб қоидабузарликларга қарши қаттиқ чоралар жорий этишни таклиф қилди. Унинг фикрича, бундай ҳаракат қилган футболчиларни дарҳол майдондан четлатиш керак.

Яна бир баҳсли ғоя сифатида у сариқ ва қизил карточкалар тизимини бутунлай бекор қилиб, уни вақтинчалик четлатиш тизими билан алмаштиришни таклиф этди. Бу ҳолатда футболчилар хоккей ёки регбидаги каби 5 ёки 20 дақиқага ўйиндан четлатилиши мумкин.

“Бизга кўпроқ шоу ва кўнгилочар футбол керак. Акс ҳолда мухлисларни йўқотишимиз мумкин”, — деди Де Лаурентис.

Унинг бу таклифлари футбол оламида кенг муҳокамаларга сабаб бўлиши кутилмоқда.